阿仙奴 曼城細均力敵

猪拉多纳

兩軍炮台藍斯 祖維迪打柴

英超重開今晚即刻有場大戰，由阿仙奴主場鬥曼城，上個月阿仙奴喺社區盾大炒「殘陣」曼城3蛋，正所謂風水輪流轉，今晚輪到「兵工廠」要殘陣出擊，繼基奧特受傷骨折要做手術後，「戰神」艾朗藍斯亦喺國際賽受傷上陣成疑，另邊廂曼城亦有祖維迪拉親腿筋，兩隊今場都有大炮缺陣，相信會踢得穩陣啲，捧2倍入球細最好不過啦！

（now621台周六晚7:45直播）

阿仙奴依家傷兵滿營，艾朗藍斯啱啱喺歐國盃外圍賽代表威爾斯受傷，雲格話賽前檢查先決定佢可唔可以披甲，就算勉強踢得都狀態成疑。另一射手基奧特之前對愛華頓時受傷骨折，要抖成4個月，無咗呢位上季為球隊射入16球嘅射手，梗係大大減弱「兵工廠」進攻火力啦！雖然新加盟嘅韋碧克上場幫英格蘭入兩粒，但去到新球會都要時間適應啦！
兵工廠早場戰績麻麻

「兵工廠」上季踢早場成績差勁，先後畀曼城、利物浦同車路士大炒，不過雲格就話只係巧合，仲話上季足總盃淘汰愛華頓都係開早波，所以唔覺得開波時間有影響喎！不過雲格喺大戰經歷連場慘敗，今場照計唔會輕易搶攻，而且阿迪達同基蘭基比斯復出，令「兵工廠」防線更加穩陣添。

曼城前鋒祖維迪喺季前熱身賽已經有5個「士哥」，早前對利物浦又梅開二度，弗到不得了，可惜佢跟黑山練波嗰陣拉傷腿筋，嚴重影響曼城入波能力。況且「藍月亮」上場喺主場輸畀史篤城，主場11連勝氣勢告終，球員難免有一定壓力，今晚兩隊波都唔想輸，或會以穩守為主，一於捧「入球細」！
盤路解碼：阿仙奴近17場英超主場賽事，開出13次「半場細」。