華倫呢期我的最愛

猪拉多纳

先斷窮根 再借尼格度

昨日講完意甲，今日肥叔輪到同大家傾吓西甲。西甲一向由皇馬同巴塞玩晒，無可否認，呢兩大班霸擁有比其他西甲球隊高幾倍嘅資源，上季有馬體會意外崛起，形成3強鼎立局面，雖然佢哋實力贏其他對手幾條街，普羅大眾照向玩上盤，但莊家往往讓得好辣，所以經常都會出現贏波輸盤，令唔少上盤客損手。當然，凡事都有兩面，喺3強愈唱愈熱之際，同時亦令其他西甲球隊評級降呢。

由於西甲焦點嘅依然落喺皇馬同巴塞身上，而且仲非常扯飛，從菠菜角度嚟講，有呢兩大班霸「掩護」，其他球隊熱極都有個譜。貴為2004年聯賽及歐洲足協盃兩料冠軍，華倫西亞一度係左右大局嘅第三勢力，可惜佢哋經營不善，搞到年年都要賣星還債，從競逐歐聯嘅勁旅，逐漸淪落為歐霸分子，評級亦不斷下滑。
往績食住愛斯賓奴

好彩「蝙蝠兵團」今夏有新加坡商人林榮福入主，有條大水喉射住之下，唔使擔心有汗出冇糧出，眾將自然踢得醒神，始終呢班波係有實力，開咧頭兩仗取得1勝1和，無論讓波定受讓均全部贏盤，證明佢哋已經入晒局，轉會窗關閉前更從曼城借入西班牙中鋒尼格度，可謂如虎添翼。

今晚華倫坐鎮主場迎戰愛斯賓奴，觀乎後者陷於低迷嘅狀態，以往作客又畀華倫食住，初盤主隊讓一球尚算合理，趁住「蝙蝠兵團」評級未升番上昔日嘅高位，宜盡早入貨。（now 632及TVB 13周日晚11時直播）