北韓最強人腳衝金 1.85倍W夠穩陣

猪拉多纳

亞運男子足球F組今日有場重頭戲，由「神秘部隊」北韓迎戰中國。你咪睇北韓唔聲唔聲，其實派咗最強人腳應戰，比起少咗6件山東魯能球員嘅中國，實力至少高半班，1.85倍主勝抵博。

（有線61、201、廣東體育及中央5台周一下午4:00直播）

由於國際足協都唔承認亞運係A級賽事，唔少國家隊徵兵都有困難，不過對於視金牌係生命嘅北韓，就完全冇呢個問題，佢哋除咗以2013年東亞運冠軍U22做班底，仲徵召咗世盃門將李明國，日職水戶蜀葵中場李榮直，同埋瑞士超巴素利個前鋒朴光龍，人強馬壯，顯然係想博金牌。
機動部隊隔絕傳媒

至於北韓嘅備戰功夫做成點呢？對唔住，冇人知喎，因為佢哋自閉得非常厲害，好似抵達仁川第一課練波，居然要求組委會安排一個中隊嘅機動部隊警察，即係成百人將啲傳媒隔離喺球場外20米咁遠，連問嘢嘅機會都冇。

事實上，北韓嘅軍情冇人知好正常，問題係佢哋會着乜嘢波衫家陣都變成一個謎，北韓官方曾經話今屆亞運，包括足球在內幾支隊伍都會着國產戰衣，點知佢哋第一課操練先着國貨，第二日就着意大利品牌LEGEA嘅贊助波衫，真係變幻莫測。
中國攻擊力麻麻

相反目標打入4強嘅中國亞運U22男足，集訓期間一直唔齊人，山東魯能嗰6件直情唔肯玩，家陣終於成軍，雖然有廣州恒大嘅廖力生、方鏡淇、廣州富力翼鋒常飛亞、葡乙馬夫拉中堅韓鵬飛呢啲有一定質素嘅球員，但係中場創造力同攻擊力始終麻麻，主場熱身賽0:0和完伊朗U22之後，先至贏到馬來西亞亞運隊2:0，打破佢哋1,040日贏唔到波嘅困局，睇番尋日南韓亞運隊數咗馬來西亞3蛋，足證中國呢隊U22水準唔多夠秤。

由於北韓以前响亞運面對中國兩戰全勝，仲齋入3球冇失波，往績完全佔上風，今場唔博北韓W就太唔理智嘞。
男亞足F組

男亞足賽制：現為分組賽階段，29隊分8組，A至E組每組4隊，F至H組每組3隊，採單循環制，每組首、次名進身16強。