維拉弗爆坐和望贏

猪拉多纳

阿仙奴支炮滑咗牙 待修中

啱啱喺歐聯畀「蜜蜂兵團」多蒙特針到周身損晒嘅阿仙奴，今晚於英超作客一鳴驚人嘅阿士東維拉。「兵工廠」眾將輸到慌晒未「回魂」，仲有韋舒亞、迪保治等一籮傷兵，奧斯爾踢到頭耷耷更成眾矢之的，呢支倫敦大炮滑咗牙，一時三刻未必修理得切，相反阿士東維拉近況堅弗，上仗更作客更贏埋利物浦，坐鎮主場仲有得受讓咁筍，讓球主勝有買趁早。

（now 621周六晚10時直播）
韋舒亞傷 奧斯爾態沉

阿仙奴剛喺歐聯分組賽作客多蒙特，「兵工廠」整場表現只屬一般，面對「蜜蜂兵團」嘅壓迫踢法多番斷纜，又唔識死將防線移前，導致多次走甩對方攻擊球員，前線攻力疲弱，冇段好睇，最終慘吞多蒙特雙蛋而回，士氣肯定跌到落最低谷。更唔好彩嘅係，阿仙奴中場主將韋舒亞喺呢場波整親腳踝未知情況如何，今仗對維拉好大機會踢唔到，連同原有嘅迪保治、基奧特、蒙利爾、禾確特等十字軍，兵源緊絀。加上另一主將奧斯爾近期被放在邊路頻頻「隱形」，踢到無厘神氣成為粉絲圍插對象，今次作客維拉相信唔會易踢。
防守夠穩 主場受讓筍

阿士東維拉開季表現Sharp醒，現時以3勝1和嘅成績排英超第2位，雖然射手賓迪基仍養緊傷，但4戰只失1粒，係全英超失波最少嘅球隊，可以話佢哋今季表現大躍進，與後防表現穩健大有關係，上仗對利物浦喺荷蘭中堅華亞爾缺陣下仍能保持不失，代替佢嘅前阿仙奴中堅辛德路斯一夫當關，上輪作客一球勇挫利物浦，呢位瑞士守將更間接助攻畀艾邦拉荷建功，今仗倒戈勢必大打爭氣波。維拉將帥現時士氣如虹，今仗主場出擊係坐和望贏格局，仲有得受讓梗係揀讓球主勝。