撐皇馬開入球「科」騷

猪拉多纳

防線立立亂 唔似守得到

時隔1季重返西甲嘅拉科魯尼亞，今晚會喺主場迎戰皇馬，「銀河艦隊」經歷聯賽兩連敗之後，周中以衞冕身份出戰歐聯雖然大炒巴素利5:1反彈，挽回番多少面子，但查實佢哋嘅攻守失衡問題仍然存在，你話今仗造訪拉科可以大炒咩？我又覺得未必，反而博兩隊開入球騷捧1.46倍入球大最穩陣。

（now632台周六晚10:00直播）

拉科今季重返西甲，首要目標梗係唔想再做升降機啦！經過3輪聯賽勝和負各一之後，暫時以4分排喺聯賽榜中游位置。眾所周知，現時嘅拉科唔止差皇馬一班波，要爆冷贏波真係難過登天，不過拉科近3仗攻入4球，火力算係見得吓人，對住立立亂嘅皇馬防線，入到波有乜咁出奇先？
拉科火力見得人

皇馬近3仗失咗7球，上周喺「馬德里打吡」主場輸畀馬體會，張峰對戰果並唔意外，始終現今足球防中極為重要，「銀河艦隊」主帥安察洛堤放走沙比阿朗素，基迪拉、比比又養緊傷，安帥搵攻強過守嘅卻奧斯同莫迪歷踢防中，根本就係為難佢兩個，後防唔大壓力就假啦！

守不穩都唔緊要，前線入番夠就唔係問題啦，皇馬坐擁身價不菲嘅「同花順」，周中歐聯對巴素利，C朗、加里夫巴利、賓施馬同占士洛迪古斯都有進帳，既然皇馬入得又失得，今晚入波唔慌少啦！

生好

(⊙o⊙)哦