蟲變龍夾硬搵藉口

不死鸟

上季不少馬匹表現反覆令練馬師被競賽小組召見問話，不過問話歸問話，你有你問，我有我答，解釋過後甚少秋後算帳，最多給予練馬師一些口頭警告，結果都在大家預料之內。以下3個個案都是上季大敗後再出由蟲變龍。
個案一：「紫荊」2月初在衛韜禮胯下跑包尾大幡，小休一個月轉戰泥地改配梁明偉成功變身；個案二：「帝豪龍駒」2月中旬在谷草1200米取得服役以來最差成績（輸10又4分3馬位），翌仗3月22日跑田草1200米入直路一踩油便逢馬過馬輕勝而回；個案三：「世界波」4月1日包尾過終點（輸畀頭馬10又4分1馬位），小休一個月再戰同一路程谷草一哩，換上柏寶卻輕勝「萬事喜」、「飛將軍」。
以上例子各有一個共通點，就是跑包尾後收埋一個月，有理由相信是由蟲變龍的藉口，所謂橋唔怕舊，最緊要受，新一季這類個案肯定還有不少。