馬來西亞攻「細」足球爭出線

猪拉多纳

和波都唔掂！

亞運男子足球A組今日有場出線生死戰，由馬來西亞火併沙特阿拉伯，呢場波馬來西亞和都唔掂，焗住採取主動圍攻實力高半班嘅沙特，咁樣其實好牙煙，沙特突擊偷雞話咁易，不妨冷敲2.02倍入球細。

（有線61及201周日下午4:00直播）
沙特得失球佔上風

A組嘅情況基本上已經明朗，南韓兩戰全勝已經出咗線，剩番嘅次名晉級席位，就由馬來西亞、沙特兩隊去爭。從形勢上講，佢兩隊都係1勝1負得3分，不過沙特淨勝球係2，馬來西亞係1，即係今場打和就馬來西亞執包袱。

正因為咁，馬來西亞今場非搏不可，而且佢哋整個亞運小組賽嘅策略，同樣係對南韓留力，對老撾求大炒，再全力爭取對沙特贏波，好似一直有傷嘅後衞艾迪爾薩富安，首戰就冇出場，對老撾至出嚟當熱身，中場羅伯特上場只踢咗30分鐘，幾件主力都收收埋埋，養精蓄銳今日同沙特死過。

馬來西亞呢套策略冇錯，問題係打波除咗策略，仲必須要有實力去執行至得。由西班牙教練安杜尼斯執教嘅沙特，雖然都係U23奧運隊班底，前鋒艾加姆迪又坐波監，但係好似後衞鴨都拉美度、中場阿迪夫、前鋒艾哈菲呢啲細路，都係嚟自中東名門艾納沙同艾阿里呢類球隊，波底紮實過馬來西亞，今日和都入到16強，實會玩控球在腳等對手嚟攻，再施以致命一擊，呢啲生死戰磨幾十分鐘先有波入一啲都唔奇。

男亞足A組