皇馬夠鑊氣炒艾爾切

猪拉多纳

西甲周中加開快車，皇家馬德里率先上陣，主場對艾爾切，皇馬「同花順」陣容開始融合發揮威力，近期無論歐聯或聯賽都狂數對手，一掃季初頹風。「銀河艦隊」已落後榜首巴塞隆拿6分，不容再失，既然已經上力，教練安察洛堤應會繼續派強陣出擊，急起直追。艾爾切只屬於護級分子，招架唔住C朗等巨星，大敗難免，皇馬讓球主勝開出機會高。

（now632周三凌晨2時直播）

皇馬「摘星政策」往往忽略球隊實際需要，導致攻守失衝，開季連番失利。不過呢班球星始終質素高，容易建立默契，而且教練安察洛堤亦屬有料之人，有佢調校，踢法愈來愈有隊型，特別係「J神」占士洛迪古斯已適應稍為墮後嘅角色，逐漸取代迪馬利亞嘅作用。
C朗順到冇朋友

最重要係C朗已擺脫傷患困擾，近3仗入5球，加上加里夫巴利腳風亦好順，任何球隊防線對住佢哋，肯定會好頭痛。雖然話皇馬防守較差，但遇上艾爾切呢類弱隊，相信難以對佢哋構成威脅，更加可以盡情數胡。

艾爾切上季升上西甲僅排尾5，驚險護級成功，但球隊始終規模有限，今季繼續為護級而戰。開季後演出依舊未如理想，除咗吞巴塞3蛋外，上仗主場0比2不敵新升班嘅「蚊型球會」伊巴，面對億萬大軍皇馬，又點會有運行。以皇馬近兩仗入13球嘅火力，今場大炒「鑊氣」好濃烈。