巴塞生猛作客鑊氣勁

猪拉多纳

安歷基大輪換個個搏殺

西甲今晚繼續開快車，榜首嘅巴塞作客火併馬拉加。巴塞唔單止兩大天王美斯同尼馬弗到爆燈，新帥安歷基極力推行輪換制，令眾將個個都生龍活龍，馬拉加又唔出世盃神龍、「墨國Sam哥」奧祖亞，點頂得住巴塞狂攻呀？不妨直取「讓球客勝」！

（now 632及TVB 13台周四凌晨4時直播）

巴塞王牌美斯開咧後一改近年獨食作風，連同歐聯在內該隊今季所入嘅12球中，有9粒係關佢事，但只入咗3球，其餘6次助攻隊友，愈來愈全面。另一前鋒尼馬因傷愈冇耐未弗，頭3場聯賽要做後備，直至日前巴塞作客5球大炒利雲特，佢終於打番正選先開紀錄，雖然因傷被換離場嘅時候仲同軍醫嘈交，但經過檢查後證實冇乜大礙，由於「咬人蘇」蘇亞雷斯下月尾復出，新仔蒙尼亞艾哈達迪及辛度拉美利斯又博上位，前線可謂爭崩頭，尼馬梗係要趁機爭取表現喇。
馬拉加教頭唔用奧祖亞

基於巴塞多線作戰，新帥安歷基亦大刀闊斧，繼上周中歐聯對尼科西亞輪換咗9個球員後，上仗對利雲特又有8人冇喺對尼科西亞之役打正選，兩仗大膽輪換咗17人，不但戰績冇受影響，眾將更加活力十足，打造開咧5戰全勝轟12粒兼冇失過波嘅佳績。

另一邊廂，馬拉加今夏簽入堅似影帝吳鎮宇嘅墨西哥門將奧祖亞，但主帥查維加西亞寧願用上季長坐冷板嘅喀麥隆門將卡文尼，都唔用「墨國Sam哥」，攻不銳守不穩下，難怪成績麻麻喇。況且巴塞近6次作客馬拉加，有5次至少贏兩球或以上，睇嚟今仗都唔會例外，一於捧「地上最強」讓球客勝。