祖記孤寒細嗒魚腩

猪拉多纳

意甲周中開快車，祖雲達斯主場對切塞納，牌面祖記贏晒，但呢支意甲三連冠踢法始終保守，今季延續「煲魚生粥」風格，加上近期賽程頻密，教練阿里基或會採用輪換制，畀部分主力休息，切勿高估。主W1.05倍毫無投X價值，讓球主客和「-2」「讓主」風險高，建議博2.6倍入球細。

（TVB302周四凌晨2時45分直播）

祖記靠個「穩」字稱霸意甲三季，既然咁奏效，新帥阿里基以不變應萬變，無論對弱隊基爾禾，以至上輪鬥AC米蘭都係小勝1比0，開季4戰全開細盤。經過硬撼AC嘅惡戰後，今場對魚腩切塞納，正係輪休好時機，畀一班主力抖下，大炒機會下降。切塞納遇上班霸祖記，勢必屯重兵防守，若能守和攞1分已達標，預料會係一場攻防戰，祖記小勝格局。
帕爾馬 羅馬「入球騷」

另一場意甲帕爾馬主場對羅馬，情況剛好相反，雙方踢法進取，帕爾馬近兩仗入7球失7球，充滿娛樂性，前鋒卡斯辛奴獨取3球，狀態弗爆。羅馬開季保持全勝，謝雲奴、迪斯度、費奧倫斯等中前場球員都係射得之人，攻擊點夠晒多，相信會上演入球騷，要大盤。