拉素烏甸駁火做大騷

猪拉多纳

今晚意甲有場獨腳戲，由拉素主場恭候烏甸尼斯。雖然話拉素一向喺自己地頭食住對手，之但係依家佢哋條防線天殘地缺，唔慌穩陣，與其估輸贏不如轉捧1.95倍入球大好過。

（TVB301周五凌晨2:45直播）
兩軍防線天殘地缺

連埋意大利盃，拉素今季主場2戰全勝兼喪入10球，火力好兇猛。賽前中場奧根耶奧拿斯、簡達華又同球會傾掂數齊齊續約，後者仲話會喺今仗搏盡砌低對手報恩。佢哋近5次主場鬥烏甸次次至少轟入對手2粒嘅鋒力，想繼續有「士哥」難度唔大。不過咁，後衞迪維積今場停賽，守將史堤芬拉度、真迪列堤又唔踢得，後防咁唔齊章難言穩勝對手。

對手烏甸尼斯近年作客拉素雖然只係攞到1和4負劣績，但佢哋並唔係冇還手之力，5戰攻入6球。事實上，呢班波喺新帥施特拉馬斯安尼領軍下表現對辦，上仗仲砌低拿玻里，肯定振奮軍心。難得見到拉素防線立立亂，仲唔趁機會數胡中止不勝戰績咩？