北韓 中國鬥架細

猪拉多纳

鐵娘子搞破壞多過建設

亞運女足8強重頭戲，北韓女足對中國女足，兩支球隊均屬於「鐵娘子」，擅長體力型踢法，以不斷跑動、硬朗搶逼同對手周旋。由於雙方都係採取「搞破壞多於建設」嘅戰術，過往交鋒入波數字少得可憐，近10次對賽，竟然有9次開細。加上今仗係淘汰賽一場定生死，大家都唔敢冒進，預料又係一場緊張而不精彩嘅拉鋸戰，首選入球細。

（有線61及201台周五下午3時直播）

北韓女足實力一向屬於亞洲數一數二，連續三屆打入亞運決賽，其中02及06年奪金，上屆決賽僅負日本0比1，主帥金正民講明今屆為冠軍而來。北韓無論男足或女足，技術水平麻麻，但勝在鬥志極強，體力又好，踢法兇狠硬朗，令對手不寒而慄，想喺佢哋身上入波，絕對唔容易。不過，北韓女足進攻板斧有限，分組賽對住一心死守嘅「魚腩」中國香港女足，都顯得老鼠拉龜，最終入5球算係預期以下。

至於中國女足強項亦係防守，分組賽對超晒班嘅上屆冠軍日本女足，成功守和0比0，爆出小冷門。不過，之後對實力弱一大截嘅中華台北及約旦，卻贏得唔多。值得一提，中國女足3月去歐洲參與阿爾加夫盃，面對世界級勁旅德國，都只係輸0比1，證明防守已達到一線水平。
近10對碰開得1次大

整體實力而言，中國女足略遜於北韓女足，估計主帥郝偉仍會採用穩陣戰術，囤重兵做好防務，再伺機突襲。睇埋雙方近10次交手，其中3次互交白卷，5次以1球分勝負，1次打和1比1。唯一一次大盤亦都只係剛好出現3個入波，今場開細機會高唱入雲。
靈感女神莎拉 是日亞足金「據」

(五)1 伊拉克男亞足 Vs 塔吉克男亞足：伊拉克今屆每場比賽最少入3球

(五)4 北韓男亞足 Vs 印尼男亞足：北韓今屆分組賽1球不失

(五)3 北韓女足 Vs 中國女足：兩軍今屆分組賽冇失過波