曼聯鬧中堅荒大劑

猪拉多纳

(六)28 曼聯 Vs 韋斯咸

曼聯上場作客李斯特城遭逢歷史性慘敗，今晚返回奧脫福迎戰「錘仔幫」韋斯咸仲要鬧中堅荒，令本身已經弱雞嘅防線更加危機四伏。韋斯咸執吓執吓愈踢愈似樣，一對箭頭組合安拿華倫西亞、迪亞法沙高侵略性高，今場捧大盤啱數。

（now 621周六晚10時直播）

曼聯上場對李斯特城頭五十七分鐘盡顯強大鋒力，可惜防線始終欠缺一名領軍人物，當失咗一個問題12碼，成條防線即時慌失失，結果連失四球倒輸收場。曼聯一對正選中堅莊尼伊雲斯早段傷出、泰萊布力基領紅要停賽，加上菲爾鍾斯、基斯史摩寧仍然養傷，勉強嚟講得馬高斯盧祖一個正宗中堅。有傳尹帥會搵卡域克或費查客串中堅，不過佢哋若然係掂，尹帥之前都唔會放佢哋喺後備席喇，就算落場都畀唔到人信心。
韋斯咸攻擊線對辦

韋斯咸近兩仗先後打和侯城及擊敗利物浦，表現有板有眼，新加盟嘅前鋒安拿華倫西亞、迪亞法沙高及莫路沙拉迪均已在聯賽開齋，嚟睇冇入錯貨，相信可喺甩皮甩骨嘅曼聯防線搵到着數，1.43倍大盤雖然稍熱，但勝在穩陣，值得支持！