莊家睇好西布朗尼料

猪拉多纳

今晚賽事戲碼較弱，冇得就咁睇名氣下注，想搵好路選擇，真係要做多啲功課。英超西布朗開始嚟料，連接喺聯賽及英聯盃踢出漂亮勝仗，呢種小型班球隊最緊要靠打道氣，西布朗踢起信心，今晚主場對仲未開齋嘅般尼，要到讓半一，可見深受莊家睇好，值得再追多一鋪。

（now 621周日晚11時直播）

西布朗人腳唔弱，後衞尼史葛、中場占士摩利臣、前鋒比拉希奴都好有質素，上輪英超作客擊敗熱刺，踢出今季代表作。西布朗開始獲莊家重視，以佢哋一向偏低嘅評級，今仗讓到半一，較為罕見，證明受各界一致睇好可全取3分。般尼今季表現好差，包括英聯盃在內，6戰未贏過，只入1球，毫無取勝把握，亦難以每場都守得住，屬於長反對象。
艾美利亞唔赦莫財拉科

西甲拉科魯尼亞主場對艾美利亞，拉科莫財，升班後冇資金增兵，以現時人腳只屬西乙級數。早前以2比8慘敗喺皇馬腳下都算數，但對住同級數對手ＣＦ格蘭納達、華歷簡奴、切爾達，都贏唔到，足證佢哋無法喺西甲立足，可以話係讓唔起聯賽中何任對手。當然艾美利亞亦唔係叻，但勝在有自知之明，以穩守行先，上仗對馬體會，守得唔錯，最終輸0比1情有可原。艾美利亞起碼可以同拉科打成均勢，甚至贏埋都唔奇。

另外，法甲波爾多今季默默起革命，踢得相當唔錯，有力阻礙巴黎聖日耳門捧盃，主場讓得起走下坡嘅雷恩半球。意甲國際米蘭亦翻生，中前場幾位球員好弗，主場對卡利亞里讓得辣，屬於大炒格。

（TVB302周日晚9時直播）
肥叔心水

波爾多上盤

切塞納下盤

國際米蘭上盤

西布朗上盤

艾美利亞下盤