西布朗般尼 水鬥水獻細

猪拉多纳

英超悶騷獨腳戲

英超嚟到第6輪，唔計尋晚嘅新特蘭，暫時得番兩隊波仲未打開勝利之門，就係包尾嘅紐卡素同般尼。冇錯，做球迷嘅絕對鍾意睇勁旅對決，但喺買波角度勁旅未必最好玩，反而中下游球隊條路更易捉！今晚英超獨腳戲由西布朗主場迎戰般尼，呢場波名副其實係一場「海軍鬥水兵」，好可能會係悶戰一場，心水推介中位數2.5球嘅「入球細」！

西布朗同般尼都係攻擊力麻麻嘅球隊，開季至今夾埋入得4粒咁大把，認真羞家！闊別4年，今季終於重返英超嘅般尼，開咧至今未贏過不特止，仲要係5場波夾埋4百幾分鐘只係入得1球，前鋒完全啞火搞到連續3場開細！無他嘅，財力有限搞到呢班波想搵個有卡士啲嘅球員孭飛都好難，睇勻成隊，唯一有睇頭嘅得個丹尼艾格斯，可惜呢位90後小將仲未喺今季英超攞到處子入球，而且睇個勢仲有排等運到添。
般尼近3場冇失波

雖然般尼火力好弱雞，但又未至於冇前又冇後嘅，睇番佢哋近3場聯賽雖然都食白果，但衰衰哋都叫做保得住清白之身，就算對住曼聯，佢哋條後防線都可以抵擋得住朗尼等球星嘅來犯，今場作客繼續靠守搶分，睇怕係佢哋比較現實、而又有機會達到嘅目標！
西布朗新兵磨合需時

至於主隊西布朗，佢哋上一輪英超小勝熱刺1粒，終於打開勝利之門。呢班波今季咁慢熱，主要原因係佢哋總共有11件新兵加盟，人腳變動好大，可以預期佢哋需要更多時間去磨合同適應。仲有一點需意留意，雖然西布朗今晚主場出戰，但對佢哋嚟講都唔一定係好事，事關呢班波主場成績出晒名水皮，近10場主場比賽贏得3場咁大把。預料今晚「兩弱」碰頭會係一場悶騷，1.62倍「入球細」應該冇走雞啦！