漢堡法蘭克福做「大」龍鳳

猪拉多纳

漢堡係德甲歷史上唯一從未降班嘅球隊，佢哋上季幾經辛苦先至保住呢個金漆招牌，可惜今季開咧後又繼續沉淪榜尾。好在，自從佢哋改由辛巴亞掌帥後，成班波表現即刻有番啲起色。雖然到依家漢堡都係等緊佢哋今季第一個入球，今晚主場迎戰防守力差嘅法蘭克福，相信好有機會開齋。考慮到兩隊都唔識守，今場買入球大最穩陣。

（有線61、64、201、203及廣東體育周日晚11:30直播）
法蘭美度積域停賽

漢堡喺德甲踢咗5輪都仲未入波，不過以拉蘇加、伊利斯域、賀治比等攻擊球員嘅質素，呢個尷尬局面相信好快可以終止。事實上，主帥辛巴亞一上任，成班球員就好似有番啲生氣咁，起碼可以喺主場悶和拜仁先。上周中雖然0:1輸咗畀慕遜加柏，但漢堡未失波之前其實控制住大局，表現唔係想像中咁差，相信今晚主場出擊會再有改善，睇好佢哋班前線球員可以喺今戰開齋。

法蘭克福近3場波得2和1負，成績亦係麻麻，睇番佢哋近兩戰都係同對手踢成2:2，有前冇後嘅踢法其實幾危險吓，而且呢班波今場仲有塞爾維亞中場美度積域停賽，冇掩雞籠嘅中後場防守力更加不堪設想！好在美亞、施費洛域等攻擊球員狀態唔錯，今場作客或會繼續有前冇後風格，1.72倍入球大冇甩拖啦！

頂占筍盤：漢堡（入球大）