北韓女足客窒南韓

猪拉多纳

亞運女足爆發「內戰」！

仁川亞運足球賽爆發「南北韓內戰」，東道主南韓女足喺4強對北韓女足，入球細值得留意。雖然南韓女足最近保持強勢，前鋒池笑然又已經歸隊，但陣中最有戰鬥力嘅射手朴恩善冇入選，不如博北韓女足開5.25倍「讓球客勝」。

（有線61及201周一晚7:00直播）

南韓女足今屆亞運睇落好似好強，暫時踢4場狂轟29球，佢哋仲要1球都冇失過。不過大家要留意，其實「太極老虎乸」嘅分組賽對手泰國女足、印度女足同馬爾代夫女足，根本渣到唔入流，而且佢哋喺女子亞洲盃，2次對住中國女足都贏唔到，遇上以體能見稱嘅北韓女足，情況真係唔太樂觀！
南韓主將池笑然剛歸隊

仲有，今次南韓女足冇徵召捲入性別風波嘅射手朴恩善，而且効力車路士女足嘅前鋒池笑然要到分組賽後至歸隊，都唔知適應時差未，日前佢喺8強對住中華台北女足，就真係冇乜貢獻，搞到南韓女足只能夠贏1:0，都幾笑大人個口，就算主場都唔值得亂捧。

其實大家睇開女足都知，北韓女足至係世界頂級球隊，佢哋嘅壓迫性打法，一般女子球員根本頂唔住，無疑氣勢上佢哋稍為輸蝕，但其實北韓女足喺8強以1:0砌低中國女足，形勢上都可以話KO對手，發揮亦見流暢，作為隊長嘅前鋒羅恩心傳得又射得要吼實呀，何況北韓女足抵達仁川嗰陣，主教練金光民都讚南韓妹有進步，明顯check足晒料，南韓想偷雞冇咁易。
女子亞運足球賽制

今輪為4強階段，法定時間內打和將加時30分鐘，未分勝負則互射12碼決勝。
「靈感女神」莎拉提醒你

上屆亞運，北韓女足喺4強加時淘汰南韓。