史篤城主W有計

猪拉多纳

病「鵲」不設防

紐卡素今季入咗唔少貨，但到依家都仲未打開勝利之門，繼續喺英超包緊艇，今晚凌晨作客史篤城，雖有幾名重心球員病愈復出，但以「喜鵲」現時嘅表現，要扭轉劣勢似乎唔多容易，所以就算史篤城主場未贏過，都要捧1.95倍嘅主W。

（now621台周二凌晨3:00直播）

「喜鵲」今夏引入唔少球員，但表現反而仲差咗，開季至今未嘗一勝，主帥柏杜更成為眾矢之的，不停畀球迷狂插，要求佢辭職返去瞓。其實，紐卡素唔係唔識得攻，但後防嚴重穿窿形同虛設，開季5場已經失咗11球。雖然佢哋今仗有射手柏比斯施斯、高法蘭同門神告魯爾病愈復出，但真馬特、大衞辛頓仲未擺脫傷患，防線依然殘缺不堪，莫講話要攻陷史篤城，能夠保持不失已算係大幸。
紐卡素今季未贏過

另邊廂嘅史篤城都唔好得幾多，作客爆冷以1:0擊敗曼城係佢哋今季嘅代表作，不過之後好似無以為繼。過往史篤城主場一向都畀人難攻不落嘅感覺，但今季一反常態，開季兩度喺自己地頭出擊都輸波，完全冇咗上季主場僅輸3場嘅氣勢，唯一慶幸係佢哋依家除咗前鋒約拿芬禾達斯之外，就冇其他傷兵，絕對有力搞掂病「鵲」，敲響主場勝鼓。