曼城屠「狼」熱捧1.48倍W

猪拉多纳

正所謂家有一老如有一寶，曼城借得林柏特更如獲至寶，呢位英格蘭中場老而彌堅，近幾場勁有料到，一雙箭頭阿古路同迪斯高亦撻着副偈，今晚喺歐聯E組迎戰羅馬，1.48倍主勝手到拿來。

（有線64及203周三凌晨2:45直播）
羅馬作客唔算標青

曼城箭頭迪斯高前排表現麻麻，好在最近佢明顯開始上力，喺英聯盃同英超連續兩場梅開二度，而前線拍檔阿古路連同上輪聯賽鬥侯城先拔頭籌，6場聯賽取得4球進帳，兩人狀態弗成咁，唔難喺主場搵食。

再者「藍月亮」中場借將林柏特亦唔嘢小，佢喺英聯盃鬥錫周三省入兩粒不特止，近兩場英超後備落場倒戈車路士同埋作客侯城都有波入，3場波踢得120分鐘就入咗4球，今晚落場隨時再有驚喜。

對手羅馬喺意甲開咧後5戰全勝，加上首輪歐聯炒起莫斯科中央陸軍，睇落戰績靚到無倫，但值得留意嘅係，「雌狼」當中兩場作客雖然贏波，不過鬥帕爾馬只係完場前入波險勝，擊敗弱旅安玻里一役，更要靠對手擺烏龍送禮，表現並非想像中咁標青，今場造訪級數更高嘅曼城，怕且好難保住今季不敗身。