南韓熱W 欺人「泰」甚

猪拉多纳

巨人金信煜傷愈復出屈機

仁川亞運男足又有好戲上演，東道主南韓男亞足喺4強迎戰泰國男亞足，諗過都係撐主勝最好。睇番兩隊都係5戰全勝晉級，雖然南韓進攻上好似冇咩板斧，不過1米96嘅巨人金信煜傷愈可以復出屈機，泰國後防身高輸蝕好難頂得住，1.3倍主W咪嫌熱。

（有線61及201周二晚7:00直播）

南韓男亞足日前以1:0險勝日本，只係靠効力廣州富力嘅中堅張賢秀，完場前射入12碼贏波。贏波過程好似好驚險，但唔好忘記其實南韓全場壓住對方打，入唔到波只係前線把握力不足，不過韓迷又唔使驚，事關大國腳嘅蔚山現代中鋒金信煜可以復出攻堅！
泰國防線好難「頂」

呢位高大中鋒喺亞洲層面絕對係屈機獸，南韓教頭李光鐘證實佢因傷缺陣兩場後可以復出，對「小太極虎」嚟講當然係好消息，事關泰國正選陣容中，後防最高大嘅中堅基沙拿特身高得1米82，要靠佢頂住金信煜真係抆水少少。

或者大家會覺得，泰國今屆踢得幾有隊型，而且有唔少做過大國腳嘅球員入選，射手卡拉宋又已經有5個入球，戰鬥力唔曳，可惜佢哋太着重地面組織，進攻上都幾單調，玩搓波南韓應該唔會怕佢哋，一旦要以「空戰」分勝負，泰國就好容易畀對手嘅金信煜屈死，一於熱捧1.3倍主W。
「靈感女神」莎拉提醒你

南韓同泰國今屆亞運都冇失過波！