巴素利憑地利劫紅軍

猪拉多纳

對英超兵特別有計

利物浦今晚會喺歐聯B組賽事作客瑞士球隊巴素利，紅軍近三仗皆未能喺法定時間擊敗對手，尤其係上仗打吡戰對愛華頓竟於完場前失守，最終由全取3分變成僅得1分，士氣始終會有所影響，今仗面對主場表現一向甚惡嘅巴素利，相信難言穩勝，度士睇好巴素利今仗可保不敗，捧讓球主勝。

（有線61及201台周四凌晨2時45分直播）

利物浦季初表現予人感覺進攻唔錯，但後防仍有不穩嘅老毛病，近三場喺法定時間內都贏唔到，而且場場都有失波。尤其係作客對韋斯咸一役，更顯紅軍一對中堅洛夫蘭與史卡迪爾嘅默契不足，多次被對手輕鬆取得入球，就算前線嘅史達寧同巴洛迪利如何努力鑽營去爭取入球，隨時出現前面入埋都唔夠後面輸嘅情況，今仗作客巴素利實在冇必勝把握。
車仔曼聯都咬佢唔入

巴素利上仗歐聯作客遇上如日方中嘅「銀河艦隊」皇家馬德里慘負1比5，表現令人感到失望。不過，巴素利喺歐聯對英超球隊似乎特別「有計」，上屆歐聯分組賽就曾「雙殺」現時英超「一哥」車路士；而2011年歐聯分組賽面對曼聯兩戰取得1勝1和嘅成績，可見巴素利喺歐聯對英超球隊似乎特別「醒神」，今仗喺主場面對近況麻麻嘅利物浦，度士睇好巴素利可以保住不敗身，捧讓球主勝。