辛尼特坐鎮地獄降摩

猪拉多纳

歡迎嚟到「地獄主場」，呢度係辛尼特地頭柏度夫斯基球場！歐聯C組賽事，法甲嘅摩納哥造訪擁有「地獄主場」嘅俄超勁旅辛尼特。俄羅斯球隊嘅主場不嬲夠惡，而柏度夫斯基球場就有過之而冇不及，「空心老倌」摩納哥想嚟踢館？冇咁易囉！辛尼特讓半一，捧上盤喇！

（有線61及64台周四凌晨零時直播）

辛尼特嘅主場究竟有幾地獄？睇吓往績就知。辛尼特過去喺柏度夫斯基球場踢咗49場歐戰賽事，當中贏咗30場，只係輸咗4場咁大把，上季歐聯亞軍馬體會喺呢個場都攞唔到3分走。除咗賽績夠堅，講狀態同士氣，點都係辛尼特秤先，喺熱刺「敗走」嘅主帥保亞斯嚟到辛尼特，重新省靚自己塊招牌，帶領球隊喺俄超頭8場贏晒，入咗26球，上場對莫斯科斯巴達連勝斷纜，其實就係為咗今場歐聯大戰而留力，雖然攻守兩員大將侯克同加雷喺比賽中受傷，但傷勢唔重今場照樣可以上陣搏殺，相當靠得住。
摩納哥縮水變空心老倌

以往洗腳唔抹腳嘅摩納哥今季縮水，接連出售同租出占士洛迪古斯及法卡奧兩大主將，但又冇買入實力球員頂佢哋嘅位置，明顯係想減輕財政負擔，依家嘅摩納哥豪門不再，只係「空心老倌」，見到球隊咁冇雄心，球員又點會有士氣踢呀？開季頭5場贏得1場就知呢隊已經係冇牙老虎，辛尼特上盤捧得過！