王牌C朗着晒火 皇馬-2照樣大炒「格」

猪拉多纳

今晚繼續上演歐聯好戲碼，衞冕嘅皇家馬德里自從喺「馬德里打吡」輸波後，成班球員知恥近乎勇，歐聯同西甲保持4連勝氣勢，王牌基斯坦奴朗拿度更加入波停不了，今場造訪失去主場優勢嘅盧多格德斯，「銀河艦隊」要喺B組再大勝多場話咁易，「讓兩球」照捧2.03倍「讓客」。

（開賽時間：周四凌晨2:45）

皇馬球星C朗拿度喺歐聯首輪斬獲1球，協助「銀河艦隊」埋單5:1大炒巴素利後，返到西甲繼續踩行油，先後食出大三元同埋大四喜，加上日前聯賽贏維拉利爾又射入埋齋波，C朗近4場獨取9球，狀態弗到咁，老實講盧多格德斯班後衞淨係要頂住佢已經難度極高，仲要頂晒成條「銀河同花順」？咪講笑啦！
盧多格德斯失地利

盧多格德斯首輪僅敗畀利物浦，但其實「紅軍」踢得麻麻，缺乏破門板斧，先至營造到佢哋好守得嘅假象。再者呢支保加利亞盟主因主場唔符合歐洲足協資格，今場被迫遷至距離大本營300幾公里嘅索菲亞利夫斯基球場舉行，連唯一主場優勢都冇埋，即使門將史杜恩諾夫坐完波監復出，睇怕都幫唔到咩手。