南北韓金牌生死戰 捧太極虎主W！

猪拉多纳

亞運男足決賽 今晚7:00爆發

亞運男足今晚上演金牌大戰，決賽戲碼係南、北韓內訌。兩隊嘅出色防守係佢哋今屆殺到入決賽嘅最強武器，不過南韓佔主場之利始終着數啲，所以爭金決心相信會喺北韓之上，而且北韓今場仲有靈魂人物鄭日冠停賽，睇嚟呢面金牌好大機會落喺「小太極虎」手上，南韓1.8倍主勝捧得過！

（有線61及201周四晚7:00直播）

南韓作為今屆亞運主辦國，賽前已經訂明男足以金牌為目標，由點兵開始已經睇得出佢哋決心好大。雖然未至於霸氣十足，但喺教練李光鐘麾下，「太極虎」成隊嘅踢法都好成熟。一路落嚟踢咗6場波零失球，防線穩陣到不得了，可見由「德甲兵」朴柱昊同金珍洙領導嘅防線，已足以令南韓立於不敗之地。
南韓箭頭金信煜傷愈

南韓今場如果順利摘金而回，一班球員可以獲得嘅獎勵係免服兵役兩年，將士用命戰意肯定不成疑問。加上被南韓視為王牌嘅前鋒金信煜已經傷愈，本來佢喺4強戰已經可以披甲，但教練李光鐘為穩陣起見，索性畀佢抖多場，等呢位射手可以喺今場決賽以十足狀態應戰，南韓進攻火力自然更有保證。
北韓殺手鄭日冠停賽

對手北韓喺準決賽踢到加時先險勝伊拉克1:0入決賽，不過贏波都付出好大代價。喺今屆賽事射入5球嘅鄭日冠食咗面紅牌，今場終極戰要坐波監。睇番呢位王牌喺淘汰賽為北韓攻入咗4球，包括半準決賽同準決賽一箭定江山，北韓殺到入決賽，鄭日冠可以話係居功至偉，可惜嚟到最重要關頭先至冇咗呢位進攻核心，北韓前線隨時亂晒陣腳，綜合各方面因素，都係南韓W抵捧啲！
盤路解碼

東道主南韓至今6戰全勝，分別有4次「主主」及2次「和主」。
Data King：南韓頻開細 決賽旺開單

‧對上3屆決賽全開「入球單」。

‧南韓今屆6戰亞運開出1大5細。

‧南北韓於近兩屆亞運均有碰頭，雙方各贏1場。
「靈感女神」莎拉提醒你

北韓主力射手鄭日冠停賽。
頂占筍盤：南韓（主勝）