伊拉克客勝「泰」山壓頂

猪拉多纳

實力高成班 銅牌袋咗9成

季軍戰有時真係冇乜存在價值，尤其今日場亞運男足泰國對伊拉克，兩邊實力差成班波，呢個銅牌伊拉克可以話袋梗咁滯，不過1.59倍客W攞嚟過關都係唔錯嘅選擇嚟嘅。

（有線61及201周四下午4:00直播）

睇番今屆亞運男足各隊表現，伊拉克同北韓應該係最強嘅兩隊，可惜佢哋4強就碰頭，始終要瓜一隊，伊拉克唔好彩同北韓班氣袋鍊足120分鐘輸波，先至「降格」爭銅牌，否則嘅話佢哋攞埋金牌都唔出奇。
泰國入4強收貨 球員博出國搵食

泰國明顯唔係伊拉克、兩韓嘅級數，今屆打入4強已經叻仔，呢場波佢哋頂到半場冇失球都萬幸，班人都係專心踢好波，博有得出國搵食仲實際啦，事關已經有日乙球會放風想簽幾個亞運「大象腳」喇。