熱刺比錫達斯攻細難求

猪拉多纳

近況表現不振嘅熱刺，今晚會喺主場迎戰比錫達斯進行歐霸盃C組嘅比賽。熱刺3大箭頭通通撻唔着，而且佢哋向來鍾意喺盃賽派副選戥腳，今次對住同樣火力欠奉嘅比錫達斯，睇怕兩邊入波都唔慌多，1.88倍入球細有得諗。

（有線61及201台周五凌晨3:05直播）

熱刺今季改由新帥普捷天奴執教，球隊喺季初連勝4場曾經為唔少球迷帶嚟希望，點知呢支倫敦球隊突然跌watt，最近6戰贏得1場咁多，對手仲要係嚟自英冠嘅諾定咸森林，士氣同信心已經跌入低潮，班波幾時先可以贏番場好波呀？
熱刺料派副選上陣

想搵救世主？射手艾迪巴約、蘇爾達杜同哈利卡尼3件每人開季至今只係入得1粒咁大把，其中艾迪巴約仲陷入球荒超過1個月，要重拾射門鞋的確係有難度。仲有呀，咪忘記熱刺近年習慣派後備兵踢盃賽，中場冇埋查迪尼同基斯甸艾歷臣等主力支援，派邊個出嚟揸旗都唔見得咁易數胡囉！

相反，對手比錫達斯喺8月底嘅歐聯外圍賽先去過英國作客阿仙奴，咁快重臨倫敦相信班波都唔使點適應。呢支土耳其球隊火力麻麻，計埋兩鬥兵工廠近7戰入得5球，仲要冇1場可以入多過1粒。啲「士哥」又差唔多集中晒喺翼鋒奧卡沙漢身上，只要熱刺賽前備戰功課做到足，要守得住對手都唔係咩難事啫，所以話，入球細真係抵捧o架。