曼城谷爆要發維

猪拉多纳

歐聯又失威 被寸「偽豪門」

「藍月亮」喺周中歐聯分組賽又失分，被寸係遇強即屈嘅「偽豪門」，成班球星谷埋一肚氣要發洩，今晚聯賽作客對「強隊點心」阿士東維拉，正好趁機會好好出氣。維拉近兩仗鬥名牌阿仙奴及車路士合共吞6蛋，表現欺善怕惡，毫無反抗能力，今仗面對阿古路、迪斯高等攻擊高手，恐怕會再次就擒，直取曼城讓球客勝。

（now621周日凌晨零時30分直播）
力爭大勝省招牌

堂堂上季英超盟主曼城今季失威，兩鬥阿仙奴僅錄得1和1負，早前對車路士更幾乎輸埋，目前喺積分榜被榜首車路士拋離5分；至於歐聯戰線同樣令人失望，周中被羅馬逼和，兩戰只得1分，出線形勢告急，仲畀傳媒、網民寸係「偽豪門」。領隊比歷連尼面臨入「城」以來最大壓力，隊長高柏尼亦話球隊應該反省。曼城連番喺大戰失利，爭勝飢渴感更加強烈，希望贏番一場漂亮勝仗以省番靚個招牌。

曼城猛將如雲，特別係一對前鋒阿古路同迪斯高腳風甚順，前者連續兩仗入波，後者近3仗轟入4球。值得一提迪斯高上季兩次對維拉獨取4球，簡直係對手嘅噩夢。唔好忘記老將林柏特亦頻頻建功。以呢支支富豪球隊嘅級數，只要發揮正常，要擊敗阿士東維拉仍然係綽綽有餘。曼城依家心態上有啲發茅，唔止想贏，仲希望嚟一場大勝以洗頹風。
維拉蜜月期已過

阿士東維拉現時可以排喺第6位咁高，皆因季初對手弱，最威係贏失晒準嘅利物浦。不過依家「蜜月期」過去，呢班波已經打回原形，近兩仗同樣以0比3輸畀阿仙奴及車路士，可見維拉嘅「卡士」同爭標分子仍有一大段距離。

事實上維拉最大弱點係太過依賴安祖斯韋文同艾邦拉荷搵食，兩人包辦晒4個聯賽入球，但單憑兩人嘅力量，實好難威脅曼城大門。防線嘅辛德路斯更係計時炸彈，雖有主場之利，但相信仍然難擋曼城嘅強勁火力。