多蒙特漢堡食「大」茶飯

猪拉多纳

多蒙特同漢堡兩支德甲老牌球隊季初出閘脫腳，今晚兩隊正面交鋒，一定希望贏波止一止個頹勢，隨時會博一鋪鬥攻。睇番多蒙特傷兵滿營，唯一可以靠嘅就係幾位進攻好手，對手漢堡啱啱打破入球荒亦重拾進攻信心，入波應該唔慌少啦！

（有線64及203周六晚9:30直播）
「蜜蜂兵」開季場場失波

「蜜蜂兵團」進攻火力一向有番咁上下，就算馬高列奧斯、米希達利恩等受傷，佢哋都仲有奧巴美揚、恩莫比尼同香川真司等猛將。可惜今季佢哋防守就大跌watt，6場聯賽場場都有失波，其中5場更畀對手攻入2球，搞到依家排喺聯賽下游，成績咁差完全歸咎條疲弱防線。

客軍漢堡上季嘅頹勢延續到今季，家陣仲喺德甲包緊尾，而且佢哋仲創咗德甲史上開季食最耐白果嘅羞家紀錄。好在上場尼古拉梅拿已經建功幫漢堡打破入球荒，相信可以提升番多少信心。呢班波如果唔想好似上季尾咁要為降班掙扎，季初唔搶分唔掂，撞正多蒙特有前冇後打死罷就，一於博佢入開有條路做番場「大」騷！

頂占筍盤：多蒙特（入球大）