祖記羅馬勢演入球騷

猪拉多纳

兩支意甲全勝之師今夜交鋒，祖雲達斯剛喺歐聯遭逢球隊今季首場敗仗，球員谷埋一肚氣，返主場對羅馬肯定大踢爭氣波主動爭勝。不過，羅馬今季演出亦非常對辦，今仗就算作客都唔會踢守勢波，會踢得主動同進取，阿謙睇好今仗入波唔會少，捧大盤。

（TVB301周一凌晨零時直播）

祖雲達斯喺今季意甲開季5戰全勝未失1球，球隊表現攻守兼備，其中阿根廷前鋒泰維斯更頻頻有波入，係球隊成績咁好嘅主要功臣。祖雲達斯上周喺歐聯分組賽作客馬德里體育會以0比1不敵對手遭逢今季首敗，一眾球員自然希望喺聯賽踢番場好波一吐烏氣，今仗縱有後衞馬田卡沙利斯、巴沙利、羅姆路蘇沙、中場派路及盧卡馬朗尼未能候命，而前鋒艾華路莫拉達亦因傷上陣成疑，相信仍會主動搶攻力求爭取勝利。
羅馬對辦作客照攻

羅馬今季同樣喺聯賽5戰全勝表現不錯，球隊更喺周二歐聯作客曼城，憑剛度過38歲生日冇幾耐嘅隊長托迪建功以1比1逼和對手，證明球隊狀態不俗。羅馬今仗前鋒波里路、中場迪羅斯、史杜特文、沙利烏簡、後衞艾斯托利以及巴沙列堤悉數倦勤，但阿根廷前鋒伊度比已傷愈復出，今仗作客相信都唔會踢守勢波，再加上球隊近4次作客對祖雲達斯都開出大盤，阿謙相信今仗入波唔會少，捧入球大。