德甲2哥鴻運當頭 慕遜地頭殺敵冇「緬」畀

猪拉多纳

上季慕遜加柏開季表現出色，去到季尾都Keep得住個勢，仲攞到歐洲賽入場券添！今季佢哋繼續「鴻運當頭」，頭6輪聯賽3勝3和不敗做緊德甲「2哥」。今晚佢哋喺主場迎戰另一隊不敗之師緬恩斯，憑住整體實力高啲、踢法又成熟啲、加埋仲有主場威力「照住」，有望開出1.75倍主勝。

（有線61、64、201、203及廣東體育周日晚11:30直播）
岡崎慎司未必踢得 緬恩斯火力削

慕遜加柏雖然要分心歐霸盃，但開季仍然保持不敗，最近喺聯賽更連贏兩場，實在難得。雖然擁躉至愛嘅艾蘭高已經離隊，好在呢班波唔係倚賴晒一個人，反而將工作分散至全隊，除咗拉菲爾基達奴同麥斯古斯一直有貨交之外，新星靴爾文同基拉馬都光芒四射，今晚主場出擊應可投以信心一票。

緬恩斯目前喺聯賽2勝4和未輸過，入咗5球嘅日本國腳射手岡崎慎司實在居功至偉。不過呢位大勇射手上場賽前突然受傷，搞到緬恩斯只能0:0悶和賀芬咸，如果岡崎慎司今場又缺陣，緬恩斯入球能力肯定進一步打折扣，作客想搶分唔係易事囉！
頂「占」推介：慕遜加柏（主勝）