衰鬥衰寧要葛度爾古斯

猪拉多纳

水鬥水，博主隊！歡喜玩足球菠菜嘅朋友，相信都聽過呢句說話，查實衰鬥衰，一樣可以博主隊，好似今日阿甲場葛度爾古斯對獨立隊，平手盤不妨要1.83倍葛度爾古斯勝。

（開賽時間：周二早上7:30）
獨立隊阿盃出局

呢兩隊點衰法？先講主場嘅葛度爾古斯，佢哋由8月31日起成個幾月時間，6場波未贏過（1和5負），跌到落積分表尾二位置，教練美亞响上仗輸咗畀沙蘭迪兵工廠之後，仲公開話想引咎辭職，家陣只係夾硬頂落去。獨立隊情況其實好好多，聯賽排第二位，只不過上場阿根廷盃生吞學生隊兩蛋出局，少咗個機會攞到自由盃參賽資格，就令成班波嘈嘈吵吵冇日安寧，依家佢哋進軍自由盃嘅希望，就剩番喺聯賽攞冠軍呢一瓣嘞。
古斯主帥面臨炒魷

正因為咁，理論上「阿甲紅魔」搶分戰意唔弱得過葛度爾古斯，近況又Sharp醒過對家，今場波應該係秤先過主隊，咁點解葛度爾古斯個W同平手上盤都熱過獨立隊呢？除咗話獨立隊近6次作客葛度爾古斯只得3和3負，往績蝕底晒之外，最重要係葛度爾古斯成班人都知道，今場再衰多鋪嘅話，唔只主帥美亞要執包袱，佢哋亦可能成為擁躉嘅襲擊目標，上禮拜三就有成40人去咗訓練營嗰邊「檢討」隊波為乜踢得咁差，所以葛度爾古斯今日唔輸得，平手盤抵博o架。