踩油衝季後賽伐木者朝聖搶Ｗ

猪拉多纳

美職周中有兩場補賽，阿King嘅過關重心落喺波特蘭伐木者主場對聖荷西地震一仗，嚟到美職常規賽最後直路，伐木者為季後賽資格發力急起直追，但依家仍然落後西岸排第5嘅溫哥華白帽1分，即係話今場不容有失，誓要全取3分，球員戰意鮮明，地震無謂阻住地球轉，一於捧主勝！

（周四早上10時30分開賽，馬會網上文字直播）

波特蘭伐木者上月尾收到噩耗，隊長韋爾莊臣斷腳收咧，將會由今年6月先加盟球隊嘅列治維擔任隊長，呢位喺英超踢咗超過11個球季嘅後衞最爆就係喺兩年前如廁時攞住一疊銀紙「清潔」，畀人插爆。不過呢件事已經係過去式，依家伐木者球迷只會記得其鎮守後防嘅英姿，仲有佢為球隊所入嘅處子士哥，佢喺今年8月對新英倫革命一仗，喪跑45碼射入個人Solo式靚波。伐木者有呢位代隊長保住後方，前線攻擊球員就可以放心全力搶攻搶分。
布城弗爆唔怕追

睇番排喺西岸第8嘅聖荷西地震，已經冇可能攞到季後賽資格，如下嘅4場波只屬例行公事，球員疊埋心水等放假好過啦，今場仲要有後衞賓圖斯停賽，主勝可以放心捧場。

另外一場美職就由FC多倫多主場對侯斯頓戴拿模，同伐木者一樣，多倫多都要力爭季後賽資格，焗住要攻，不過佢哋有後衞馬克布隆缺陣，隨時有攻冇守，大盤可期。最後講埋英錦標獨腳戲，車頓咸主場對布里斯托城，英甲榜首布里斯托城狀態不俗，近七戰錄得五勝二和，今場有力擊敗乙組仔車頓咸。