高士路 勝在有泰

猪拉多纳

鋒力冠絕巴甲！

聽朝巴甲焦點對決，「一哥」高士路迎戰傳統勁旅哥連泰斯。爭取衞冕嘅高士路，今季個主場惡到痹不特止，更係目前唯一一支入球達50+嘅隊伍，今場對住作客愈踢愈曳，首席射手荷西古里路又唔識入波嘅哥連泰斯，捧1.95倍高士路半一上盤，至少穩執半格。

（開賽時間：周四早上9:00）
主場13戰贏11場

巴西米納斯吉拉斯聯邦大學最近有統計指，現時揸住56分喺手嘅高士路，只要有73分衝過終點嘅話，衞冕成功率將會高達93.88%，換句話講，佢哋喺剩餘12輪聯賽中，最低限度攞多17分就掂檔。

之不過數字歸數字，相信巴甲錦標一日未落袋，高士路都唔敢放鬆。更何況佢哋今季主場13戰贏11場，鋒力更冠絕整個聯賽，其中首席射手、玻利維亞國腳馬些路摩連奴近排腳風頗順，上場就算缺少中場猛將列卡度高拉特，都照擊敗「二哥」國際體育會，今輪趁勢再下一城話咁易啦。
哥連泰斯鋒線啞火

另邊廂，排第6位嘅哥連泰斯落後高士路13分，雖然中場柏路斯深信佢哋能夠迎頭趕上封王，不過講就容易咯，睇見佢哋近6場作客1和5負，真係好難捧得落手。最弊嘅係首席前鋒荷西古里路近8場作客僅得1球進帳，今場即使高士路中堅達迪安達臣要坐波監，老實講都未必佔到咩甜頭，今場邊有本事結束作客連敗走勢吖。