學生隊爭勝無所颶

猪拉多纳

阿甲球隊學生隊最近表現唔錯，擺脫季初唔穩定嘅狀態，近3周喺聯賽節節上升。今晚佢哋喺阿根廷盃出擊，主場對阿乙球隊颶風隊。雖然學生隊入球能力唔算強，但係颶風隊作客曳到飛起，所以2.67倍嘅「讓球主勝」值得去馬！

（開賽時間：周四早上6:10）

學生隊今季開賽表現唔多穩定，一度喺聯賽中游位置徘徊，不過佢哋近期表現開始有改善，連埋上輪阿根廷盃贏獨立隊，佢哋已經連贏3場，成隊波士氣高漲。大腿有輕傷嘅後防謝文利爾，上周聯賽作客以2:1擊敗奧林普場波有上陣，腿傷已無大礙，今場應該冇問題。另一後防干尼大腿傷勢未好得晒，相信唔會趕住復出。

另邊廂，颶風隊近期狀態超唔掂，近8仗只得1勝，上輪可以晉級都係靠12碼KO班菲特。佢哋作客同樣唔多掂，近6次作客都冇贏過，名副其實係「作客蟲」。以颶風隊依家咁嘅表現，去到學生隊主場莫講話要贏，想入波都唔容易，不如專心踢聯賽好過啦！