瑞典抗俄細孤力弱 伊巴上陣成疑攻力銳減

猪拉多纳

歐國盃外圍賽今晚重燃戰火，以G組瑞典主場硬撼俄羅斯之戰最勢均力敵，不過前者王牌兼隊長伊巴謙莫域有傷在身，上陣成疑，冇咗伊巴猶如自斷半臂，但俄軍作客出擊一向穩紮穩打，細鬼預計今仗唔慌多波入，細盤乃不二之選。

（有線63台周五凌晨2時45分直播）

如果話葡萄牙已成為C朗嘅一人球隊，呢個論點同樣適用於坐擁伊巴謙莫域嘅瑞典，因被稱為「呂布」嘅伊巴個人能力極強，入波助攻組織瓣瓣掂，相比之下其他隊友嘅能力同佢差幾條街，加上霸氣外露甚有感染力，絕對係一人撐起半邊天。可惜，伊巴自上月尾為聖日耳門對里昂時拉傷大腿後，已經連續四場缺陣，包括歐聯對巴塞嘅重頭戲，睇嚟佢傷勢唔輕。不過瑞典一直太過倚賴伊巴去解決問題，欠缺B計劃，冇咗佢等於自廢五成功力，主帥咸雲坦言呢位33歲隊長能否出場都係「五五波」，細鬼認為就算佢夾硬披甲都未必有好效果。
卡比路擅打守勢波

另一邊廂，在世盃分組賽出局嘅俄羅斯近兩仗大勝入八粒，表面睇好似好弗咁，但對手只屬列支敦士登及阿塞拜疆之流，千祈唔好畀佢哋呃到。最重要係「北極熊」嘅揸弗人仍係卡比路，呢位意大利籍教頭骨子裏流住保守嘅血，面對弱旅仲會試吓進取啲嘅打法，一旦遇到勁敵兼作客就原形畢露，此乃江山易改本性難移。

從現實角度嚟睇，由於小組頭兩名都可進身決賽周，而呢組最勁嘅不外乎瑞典、黑山及奧地利，因此俄羅斯作客打和出線勁敵亦冇乜蝕底，何況對住極有可能冇伊巴嘅瑞典要守唔難，細鬼左度右度之下，覺得捧入球細更加穩陣。