三獅兵冇氣細 魚腩有骨啃唔諾

猪拉多纳

朗尼韋碧克孭飛 火力麻麻

歐洲國家盃外圍賽今晚展開激戰，英格蘭喺主場迎戰E組「魚腩」聖馬力諾。論牌面「三獅兵團」雖然冇得輸，可惜佢哋有史杜列治缺陣，前線由躁爆射手朗尼同韋碧克掛帥，中場又搵唔到對似樣嘅射門鞋，大屠殺冇咁易上演，今仗入球中位數開到5.5球，2.15倍入球細值得一試。

（有線61及201周五凌晨2:45直播）

「三獅兵」新隊長朗尼近年喺國際賽冇乜貨交，早前仲喺英超怒踢韋斯咸中場達寧領紅，咁唔成熟，點旨意佢喺今場做番齣好戲先？難為領隊鶴臣仲出聲盲撐，話唔擔心朗尼情緒問題，又鼓勵佢爭取入球超越名宿格里夫斯升做國家隊史上第3射手，咁搞法容乜易朗尼掛住破紀錄罔顧國家隊利益呀，對「三獅兵」冇着數喎！
聖馬力諾守力提升 英格蘭有後顧之憂

佢今場嘅鋒線拍擋韋碧克轉投阿仙奴後表現好轉，可惜把握力始終仲係差啲，萬一同朗尼鬥獨食嘥機會就認真擇使。想搵中場幫手後上士哥？睇番今次英格蘭名單，中場得阿歷士張伯倫、占士米拿同安祖斯唐辛3件入過波，夾埋仲要入得5球咁大把，何況佢哋唔算得上係必然正選添，真係想搵多個人嚟數胡都難。

對手聖馬力諾雖然畀人認定咗係「歐洲魚腩」，但實情呢支國家隊防守力不斷提升，對上7場作客除咗鬥烏克蘭吞9蛋之外，對住意大利、波蘭、黑山都未試過輸多過5粒，就算佢哋兩年前造訪英格蘭都係輸0:5，睇得出呢舊魚腩唔再係任食唔嬲。況且鶴臣喺賽前挑釁聖馬力諾話想大勝多一鋪，肯定激起聖軍球員鬥志。只要佢哋唔喺早段失守，有3日後遠征愛沙尼亞後顧之憂嘅英格蘭，想大屠殺都有一定難度。
歐國盃E組

Data King：「三獅」近10次主場7勝

‧英格蘭近10次主場出擊贏7次。

‧兩軍4次交手，「三獅兵團」一共射入26球失1球。

‧聖馬力諾連續7場作客未贏過，1球未入兼失33球。
盤路解碼

英格蘭今年9戰開5口入球細，比率達56%。