比利時安全至上見好就收

猪拉多纳

B組比利時首度出擊，主場要贏世界排名203位嘅安道爾可謂絕對冇難度，球隊目標反而係下周二凌晨作客波斯尼亞。預料世盃8強分子比利時今仗應會有所保留，甚至多派副選試陣，冇必要大炒安道爾。至於安道爾亦肯定屯重兵死守，一於輸少當贏，咪奢望佢哋入波。入球大細中位數調高至4.5球，可博1.8倍細盤。

（有線18台周六凌晨2時45分直播）
留力鬥同組三強

比利時近年人才輩出，夏薩特、盧卡古、費蘭尼、高柏尼、泰拔高圖爾斯都係英超響當當人物。球隊爭出線最大威脅來自波斯尼亞同以色列，而有加里夫巴利助陣嘅威爾斯亦唔可以睇小。因此，比利時為集中力量對付上述3支勁敵，加上佢哋根本唔會將安道爾放在眼內，故為安全計，未必會派最強陣容出擊，以免主力傷疲。

再睇番往績，比利時原來甚少錄得大勝，就以上屆世界盃外圍賽為例，佢哋10戰只有1場入波達到3球，其餘都係一球起、兩球止，包括主場贏最弱嘅馬其頓1比0，可見佢哋鍾意見好就收。為免主力喺呢受傷亦無謂浪費氣力去大炒呢支魚腩。
安道爾負隅頑抗

至於安道爾自知技不如人，肯定死守，只要唔輸得太肉酸，已經有交代。上屆世界盃外圍賽兩戰荷蘭，都只係分別輸0比3同0比2，可見有一定抵抗能力。同埋強隊遇上佢哋，都知道勝券在握，難免會輕敵，因此安道爾未必會大敗。