威爾斯下盤發圍

猪拉多纳

加里夫巴利孭飛反擊波斯尼亞

足球係一項好特別嘅運動，既講求團體合作，但一位超級球星卻足以憑個人力量改變戰局。由以往比利、告魯夫、馬納當拿、巴治奧，到依家嘅美斯、C朗、加里夫巴利都係當中佼佼者。歐洲國家盃外圍賽B組，威爾斯喺加里夫巴利擔大旗下，眾志成城，已成為一路異軍，主場對「雜牌軍」波斯尼亞獲受讓平半，度士睇好威爾斯下盤。

（有線64及203台周六凌晨2時45分直播）

威爾斯曾經出產過曉士、傑斯等球星，但講到個人感染力，都唔及加里夫巴利。呢位皇馬快翼屬於世界頂級球員，威爾斯上輪外圍賽就係靠佢梅開二度反勝安道爾，喺小組旗開得勝。加里夫巴利嘅出現令隊友睇到希望，覺得威爾斯有力打入決賽周，必然分外落力爭取勝利。

事實上，威爾斯人腳唔曳，大部分球員喺英超及英冠搵食，包括水晶宮門將軒尼斯、熱刺後衞賓戴維斯、李斯特城中場安迪京治及前鋒湯馬士羅倫斯。即使艾朗藍斯及祖阿倫因傷缺陣，但只要加里夫巴利發揮應有水準，威爾斯可以利用佢嘅驚人速度，大踢穩守突擊戰術，今場可以話坐和望贏。
波軍態沉讓唔起

波斯尼亞最大殺着係曼城前鋒迪斯高，但佢屬於純射手，唔似加里夫巴利有獨自搵食能力。波軍其他位置實力參差，而且巴爾幹球隊凝聚力較弱，即使有優秀球員，但返回國家隊往往冇料到，塞爾維亞就係最佳例子。波斯尼亞上仗主場都輸畀塞浦路斯，今仗作客更加冇本錢讓波。