巴西 阿根廷世紀大戰

猪拉多纳

最強10號火併

百年恩怨，還看今朝！巴西同阿根廷多年嚟為南美一哥之名爭崩頭。適逢今屆「南美超級打吡」正值100周年紀念，兩軍移師北京鳥巢決一死戰，為名利為尊嚴，兩位「最強10號」美斯同尼馬，肯定諗盡辦法喪攻、砌低死敵揚威，一於撐1.8倍入球大。

（TVB302台周六晚上8:05直播）

「南美超級打吡」前身路卡盃（Roca Cup），呢個盃喺1914年創立，之後斷斷續續舉行過11屆賽事。直至2011年先重新舉辦並改名「南美超級打吡」，巴西亦連續2屆贏得冠軍。上年因為遷就洲際國家盃所以停辦，今年賽會選址北京鳥巢比賽，並改為一場定生死，比賽肯定加倍刺激。
羅賓奴 卡卡助拳 尼馬專心爭士哥

為咗喺呢場百年大戰爭勝，雙方齊齊徵召外流巨星歸隊助拳，巴西更重召缺席國家隊18個月嘅卡卡返嚟，有佢同羅賓奴2位經驗豐富嘅戰將壓陣，「森巴兵團」無論突破、組織、埋門都唔使再靠尼馬一腳踢，尼馬自然可以專心爭士哥啦！以「新比利」開季入波仲多過美斯嘅表現，阿根廷條防線都幾難阻到佢。
美斯唔敢散步 迪馬利亞當弗

另邊廂嘅阿根廷，喺新帥馬天奴帶領下有個好開始，上個月大勝德國4:2，報番世盃決賽落敗之仇。不過嗰場波美斯係冇份踢嘅，事後唔少媒體都寸爆咁話冇咗美斯嘅阿根廷其實仲掂，睇怕「球王」今次都唔敢再散步，要搏盡挽回聲譽先得。仲有，美斯好拍擋迪馬利亞，「入魔」後嘅表現相當Sharp醒，今晚對住由「大衞地雷斯」統領嘅森巴防線肯定大把「餐士」。既然兩軍把握力都有番咁上下，入波應該唔會少得去邊啦！
盤路解碼

巴西喺今年踢咗12場比賽，7次開出入球大，比率達58% 。
兩軍往績五五波

雙方一共交手109次，巴西取得43勝25和41負。

阿根廷連續10場未輸過，當中7場0失球。

兩軍近6次交手，開出4口半場波膽0:0。