德國 愛爾蘭 演入球騷

猪拉多纳

防線有隱憂入得又失得

今夏第4度登頂成為世盃盟主嘅德國，上仗竟然勁羞家咁喺歐洲國家盃外圍賽D組作客輸畀波蘭，今晚佢哋返番自己地頭出戰愛爾蘭，梗係想大勝一場氹番球迷。但考慮到「日耳曼兵團」後防冇以前咁穩陣，未必咁易保住清白身，計落都係捧1.48倍入球大好過。

（有線61及201周三凌晨2:45直播）

「日耳曼兵團」上場輸畀波蘭0:2後飽受批評，皆因呢場敗仗中斷咗球隊81年嚟對波蘭嘅不敗紀錄，同時亦結束德軍近7年喺大賽外圍賽同之前20場正式賽事不敗佳績。依家一眾德兵勁想挽回面子，今晚回師主場出擊肯定想搵愛爾蘭做出氣袋。
後防大執位 連續3仗失波

事實上德軍上仗埋門機會唔少，只係送唔到個波入網，預料射手普多斯基今晚重返正選，拍住湯馬士梅拿同馬里奧葛斯攻堅，火力仍舊有保證。之不過後衞拿姆、梅迪薩卡已經退役，防中基迪拉、基拉馬同守將舒姆沙又唔踢得，防守力明顯跌Watt，佢哋想喺今晚零封對手中止德國連續3仗失球走勢唔易喎。

另邊廂愛爾蘭喺分組賽兩戰全勝，上場更狂數直布羅陀7:0令全隊信心大增。領隊奧尼爾講明預備好幾道入球板斧，誓要為德國製造麻煩，中場吉遜更揚言要全取3分，睇得出班波唔會泊大巴等完場。以沙恩朗、艾登麥基迪等高速鋒將打反擊，有力搗亂德國後防。弊在負責把守最後一關嘅大衞科迪只係効力英冠球隊米禾爾，級數有限，國際賽經驗又唔多，未必頂得住德國狂攻濫炸。既然兩軍防守各有隱憂，睇怕一場入球騷都應該走唔甩喇。

盤路解碼

德國今年14場比賽中開出7口「大」，比率達50%。