塞內加爾 冷W突圍

猪拉多纳

紐卡素「黑雙煞」鋒線再現

喺伊波拉嘅陰霾之下，非國盃外圍賽繼續激戰連場，突尼西亞同塞內加爾今晚易地再戰，塞內加爾喺呢場G組榜首大戰前夕，雖然話有射手蘇維受傷退隊，但反而造就柏比斯施斯同丹巴巴亞重組昔日嘅紐卡素「黑雙煞」鋒線，造訪突尼西亞有望攞晒3分，冷敲3.75倍客W！

（TVB302周四凌晨3:15直播）

伊波拉肆虐，摩洛哥足總早排要求將原定明年1月開打嘅非國盃決賽周延期，不過非洲足協已經否決咗呢項提議，塞內加爾領隊居里斯亦都好大反應，佢前日受訪時話：「延期3個月定6個月呀？對件事毫無幫助，根本唔驚得咁多，照踢啦！」又搶韁又夠火，居里斯係夠「Pop」嘅！

塞內加爾上周五主場同突尼西亞互交白卷，前鋒蘇維勇戰受傷，賽後證實左腳小腿肌肉撕裂要退隊，本身呢個係壞消息，但亨格比利就認為係因禍得福。
突尼西亞靈魂停賽 主帥未打先騰雞

事關蘇維缺陣，意味住柏比斯施斯將會擔正，呢位紐卡素射手新季英超已有4個「士哥」，加埋効力比錫達斯嘅丹巴巴亞克服足踝傷患可披甲，呢對昔日喺英超呼風喚雨嘅「喜鵲黑雙煞」鋒線，要射爆突尼西亞大門容乜易！

將會喺主場出擊嘅突尼西亞，今仗有中場靈魂兼隊長積克侯爾累積夠黃牌自動停賽，領隊利堅斯都話要為前者搵替補係極難嘅任務，又話一旦畀到空位塞內加爾班人造波就會好危險，主場出擊都騰晒雞，似乎冇乜把握喎！

非國盃G組