伊巴守細波抗巴塞

猪拉多纳

遊完「飛機河」尼馬 美斯做後備

西甲今晚重燃戰火，巴塞隆拿會喺主場迎戰升班球隊伊巴。喺過去嘅國際賽檔期，「地上最強」幾位主力美斯、尼馬、馬斯真蘭奴等長途跋涉到訪亞洲，話就話對手實力唔強，但係一來一回飛咗接近2萬公里，「張峰」今次仲可以證實幾位阿根廷國腳比完賽就趕住上飛機添！巴塞一向主場讓波太多，不宜過分追捧，既然入球中位數升到3.5球，倒不如博伊巴頂得住，撐1.9倍入球細。

（now632台周日凌晨2:00直播）

巴塞喺聯賽取得6勝1和不敗成績，仲要7戰皆保持清白之身，防守力一流絕對係佢哋暫列榜首嘅原因。今晚佢哋主場面對鋒力平平嘅伊巴，要再保持清白之身冇難度可言。雖然尼馬早幾日對住日本食出「大四喜」，近況甚佳，不過咁樣長途跋涉法，話對佢冇影響就勢係假。
質素一般團結搭夠

更何況「遊飛機河」又點止得尼馬一個先？相信美斯喺香港嘅表現大家仍然津津樂道，「張峰」能夠成為美斯對手，更係有今生，冇來世，比賽過後仲目睹美斯拉住個行李篋趕飛機添。不過咁飛嚟飛去對球員負擔咪話唔大，難怪有傳媒估計兩位「球王」今晚可能會抖下做住後備先。

今季首次升班挑戰西甲嘅伊巴，暫時排喺聯賽榜第9位，近4仗未嘗一敗，士氣唔錯。呢隊波雖然質素一般，但勝在夠團結，球味一流。要佢哋喺巴塞身上入波係就係難啲，不過伊巴喺防守方面踢法硬朗同充滿紀律性，就算今晚去到魯營球場都唔會輕易投降，想炒起佢哋唔易o架。
盤路解碼

巴塞今季9戰，當中6場開入球細，比率達67%。
Data King：巴塞開季7戰冇失波

‧巴塞連續52場主場聯賽有波入。

‧巴塞成為西甲史上首支開季連續7場冇失波球隊。

‧只要巴塞射手美斯入多3粒，即可以252個入球刷新紀錄成為西甲入波王。