國米殘陣讓唔起拿玻里

猪拉多纳

國米近期當黑，多位主力連接受傷，首席射手奧斯華度更加要抖一個月，攻力勢必大打折扣，有主場之利亦惡唔出樣；反觀拿玻里否極泰來，已走出季初困局，取得三連勝。呢支上季季軍當頭起，仲有得受讓平半，必捧拿玻里下盤。

（TVB301周一凌晨2時45分直播）

國際米蘭上輪慘吞費倫天拿3蛋之餘，仲有奧斯華度受傷，呢位意大利國腳今季聯賽已轟入4球，同拍檔莫路伊卡迪合作絲絲入扣，佢缺陣之下，甚至會影響埋後者發揮，令鋒線威力驟降。禍不單行係兩位中場古亞連及加利美度都喺早前踢國際賽時受傷，加上兩閘長友佑都、迪岩布斯奧亦有傷在身，上陣成疑。國米今場可能冇咗一半主力，都咪話唔危。另外，國米教練馬沙利帥位亦不穩，有傳如果今場輸波，就會被炒，球隊士氣低迷，隨時送佢一程。
客軍將帥誓踢爭氣波

拿玻里終於有起色，連歐霸盃在內三連勝，拿玻里本身人腳質素屬於意甲數一數二，季初開局唔順，影響信心，依家有番霸氣，表現應會更加得心應手。值得一提，拿玻里教練賓尼迪斯之前被國米炒魷，中場恩斯治尼亦試過被國米嫌棄，話佢生得矮，所以唔簽佢。將帥都對「藍黑兵團」恨之入骨，今仗勢必大踢爭氣波。