殘兵大佬史達寧 單騎救紅軍

猪拉多纳

利物浦賣走蘇亞雷斯後，幾乎完全啞晒火撻唔着，一條星級鋒線變晒「殘兵」，「腦殘」巴洛迪利加盟咁耐都只係入得1球咁大把，「身殘」嘅史杜列治抖咗6個禮拜原本話今場復出，點知尋日練波又傷再要抖多3個星期，今晚「紅軍」喺英超作客昆士柏流浪，又要旨意早前投訴「被榨乾」嘅史達寧1個，上演一幕單騎救紅軍！
史杜列治又傷 抖多3星期

其實「You'll Never Walk Alone」係好有意思嘅，並唔能夠單靠字面解釋立亂引用，不過史達寧今晚喺鋒線嘅環境，就堅係Walk Alone喇！事關巴洛迪利加盟利物浦之後，只係試過喺歐聯對盧多格德斯入波，表現完全唔對辦，據聞「紅軍」除咗打算買多蒙特嘅馬高列奧斯，仲考慮提前回收外借到里爾嘅奧歷治補充火力，好衰唔衰王牌箭頭史杜列治尋日練波又拉傷小腿，據報佢要抖多3個星期，搞到今晚作客昆士柏流浪，入波重任就落晒喺19歲嘅「殘兵之首」、史達寧身上喇！

史達寧上星期自稱「太攰」，拒絕為英格蘭披甲引起軒然大波，不過呢位麻煩友堅似足漫畫《火鳳燎原》入面嘅殘兵大佬燎原火（趙雲）咁，先天身體條件不足唔緊要，但仍然憑一副好身手，喺百萬軍中取上將首級，猶如探囊取物，勁到非現實。英國《每日鏡報》統計顯示，史達寧比起英超兩大進攻核心大衞施華同夏薩特，其實仲恐怖！
史達寧衝刺次數 遠超施華 夏薩特

數據顯示，3人今季跑動距離，史達寧係最少嘅一個，走動少成7,000米，不過呢位小將唔似得大衞施華同夏薩特有咁多勁隊友幫手，佢幾乎每次進攻都係「單騎救主」，唔單止衝刺次數高過兩大球星，2,381米嘅衝刺距離更加係夏薩特2倍有多、大衞施華3倍以上，認真誇張！

由於未來21日，利物浦需要面對7大戰役，當中包括歐聯兩戰皇馬，同埋聯賽惡鬥車路士，一個唔覺意，隨時會將歐聯同英超冠軍斷送，睇怕體力透支嘅史達寧都要頂硬上咯。
Data King：利物浦對賽贏條街

‧兩軍近6次聯賽交鋒，利物浦取得5勝1負。

‧「紅軍」近13場英超只得1仗保持清白身。

‧利物浦近15場英超造訪倫敦球會有14球進帳。