西甲：馬體會開火 主場煲魚生粥

猪拉多纳

愛斯賓奴反彈硬淨

周日西甲早場賽事，馬德里體育會主場恭候愛斯賓奴。衞冕嘅馬體會近兩季主場演出極具說服力，踢完半場就判對手「死刑」嘅比賽屢見不鮮，為咗幫周中歐聯迎戰馬模壯行色，今場贏波可以話志在必得。之不過愛斯賓奴近況唔錯，今晚一球上落機會頗大，一於揀馬體會3.3倍「讓球和」。

（開賽時間：周日晚6:00）

馬體會中場線除咗保留基比、佐治高基、阿達杜倫等上季奪標功臣，仲由皇家蘇斯達簽入法國國腳基沙文，進一步增強球隊創造力。從日前基沙文代表「高盧雄雞」踢兩場熱身賽所見，佢狀態唔錯兼有一個士哥，今晚有力肩負起進攻重責。馬體會除咗中前場煞食，一對中堅拍檔高甸同祖奧米蘭達喺死球攻勢亦偶有斬獲，兩人夾埋已經入咗4球，今晚喺主場點會入唔到波先？
「馬體」基沙文夠弗 中堅拍檔省4粒

不過馬體會想大勝嘅難度亦唔細，事關愛斯賓奴經歷季初4場不勝後，球員知恥近乎勇，自上月底擊敗基達菲敲響勝鼓，最近3場聯賽取得2勝1和，表現硬淨。更何況箭頭史杜安尼同沙治奧加西亞，開咧至今聯手貢獻咗7球，狀態不俗，而且後防經過季初一段時間磨合，亦逐漸培養出唔錯嘅默契，已連續3場不失，相信今場作客卡達朗球場會為馬體會製造唔少麻煩。