曼聯征西又炒大鑊

猪拉多纳

五星級前鋒 豆腐渣防線

上季英超一路跟住利物浦買大盤嘅朋友應該都中幾多，今季呢個盤路似乎去到曼聯身上，同樣係入得又失得，前面星光熠熠，後面就慌失失，門將迪基亞幾勁都擋唔晒對手每個攻勢，今場「紅魔鬼」作客西布朗，算係今個月最易一仗，唔搶分仲等幾時？不過西布朗都有個托弗前鋒比拉希奴，紅魔嘅防線一旦走漏佢都幾大鑊，今場一於捧入球大啦！

（now 621周二凌晨3時直播）

科娜上季睇利物浦賽事睇到要狂平安鐘同食救心丹，不過今季到我啲曼迷朋友睇到心臟病發，兩隊波同樣係有前冇後，前面要入波唔難，後面失波亦易。曼聯今場繼續有朗尼停賽，不過近呢幾場波見到「紅魔鬼」嘅靈魂人物已經唔再係佢，而係「天使」迪馬利亞，「天使」用神級表現證明咗曼聯用破英超紀錄買佢返嚟係值得嘅，呢位阿根廷翼鋒能傳擅射，有腳法有速度，仲有招「蠱惑的槍」，使出似傳又似射嘅魔法呃晒對手，非頂級後衞係唔會守到佢。

曼聯賽前仲有個大好消息，就係月初因肋骨骨折而養傷嘅中場安達靴里拉神奇康復，今場有望上陣，將大大加強球隊嘅攻守轉換能力，有佢復出，曼迷又點會因為翼鋒路爾斯華倫西亞因傷缺陣而閉翳呀﹗而且「老虎」法卡奧開始重拾射門鞋，上場對愛華頓射入首個士哥後，跟住喺國際賽代表哥倫比亞亦有波入，有迪馬利亞、桑馬達同安達靴里拉負責餵波，「老虎」只需要擘大個口就O趙得入啦！

西布朗比拉希奴弗爆

不過「紅魔鬼」繼續鬧中堅荒，莊尼伊雲斯肯定缺陣，菲爾鍾斯同基斯史摩寧即使傷愈都狀態不足，領隊尹戈爾今場又要出新仔中堅泰萊布力基守住中路，防線只係豆腐渣水平。西布朗21歲前鋒比拉希奴最近成為灸手可熱嘅新星，近3場聯賽入咗4球，佳態再延續去英格蘭U21賽事，助球隊晉級明年U21歐國盃決賽周，面對咁脆弱嘅紅魔防線，又係起筷時候！