熱拿亞安玻里射手大鬥法

猪拉多纳

今輪意甲壓軸戲碼，由熱拿亞主場對安玻里，兩隊一老一嫩射手互相輝映。熱拿亞前鋒馬特尼鹹魚翻生，大踢爭氣波，近期頻頻有波入，安玻里方面亦有佩斯亞利尼數胡，呢位被譽為「新迪比亞路」嘅新星功架十足。兩軍級數咁高咁大，當然唔會向對手示弱，預料將會鬥攻搏拳搶分，入球大有2.22倍好分頭，值得一博。

（TVB 301周二凌晨2時45分直播）

30歲嘅馬特尼近年効力過祖雲達斯及ＡＣ米蘭，可惜表現令人失望，被指難登大雅之堂。佢今季放低身段轉投細會熱拿亞，果然有起色，近3仗更轟入3球，腳風非常順。呢位前意大利國腳可以重拾射手鞋，好大程度上因為熱拿亞教練加斯柏連尼喜歡用三前鋒陣式，令馬特尼獲得較多支援，盡展「禁區殺手」本色。不過熱拿亞後衞朗卡尼亞及中場史杜拿路因傷缺陣，削弱防守能力，恐怕難保清白之身，既然今仗主場出擊，相信都唔會以守為目標，一於攻個徹底。
佩斯亞利尼似足迪比亞路

客軍安玻里嘅23歲前鋒佩斯亞利尼演出亦好Sharp醒，近三仗都有波入，佢屬於「9號半」球員，傳射能力俱佳，甚有前輩迪比亞路影子，絕對唔可以睇小。問題係安玻里防守向來麻麻，尤其作客防線更多甩漏，今季3場客戰已經失咗5球，受讓未必靠得住，大盤較可取。