齊喝采直路最在行

不死鸟

李易達成倉九成馬來自澳紐，K301「齊喝采」係少數嘅歐洲貨，先要搞清楚，這匹不是「齊歌頌」同主新貨，馬主葉俊亨過去養過「出騏好」及「出騏制勝」，前駒乃新西蘭PPG，曾在4班3捷，後駒則為澳洲自購馬，弊在來港20戰未贏過，或因對上一駒太過失望，萌生決定改購歐洲馬。
「齊喝采」來頭唔簡單，兩歲在英跑8場2贏4位，威水史係上年於新市場七月盃賽期，勝出Superlative Stakes二級賽，連埋先前開齋之役，打疊贏兩場1400米直路賽，跑4次直路不勝有位，反而轉彎唔識贏，後尾在古活及雅士谷再跑二級賽，兩場都係右轉，但跑來有前冇後，希望只係經驗問題，否則在港出路便相當狹窄。
血緣方面，老豆Traditionally乃土生土長美國馬，同父系有「無雙小子」、「易發發」和「稻庭烏冬」，3匹都係Traditionally南半球子嗣，前兩駒先後贏過馬，表現得相當早熟。母系與「期望」同出自Mujadil，亦係美國種，在愛爾蘭出賽曾兩勝1000米，由於血統帶濃厚美洲色彩，「齊喝采」在彼邦亦跑過兩次膠沙地均上名，估計合跑泥地成數甚高，不過，來港前跑兩歲二級賽有贏有輸，評到88分有點嫌過高，勿胡亂追捧。