川崎 鳥棲大玩快樂足球

猪拉多纳

最緊要好玩！响今日川崎前鋒主場對鳥棲砂岩之前，已經270分鐘日職比賽冇波入嘅川崎射手大久保嘉人，強調會抱住快樂足球嘅心態面對入球荒，既然連主將都咁講，呢場波不妨玩吓個1.7倍入球大喎。

（有線64周三晚6:00直播）
主隊搞萬聖節Party

如果從爭奪亞冠盃入場券角度去睇，今場波係場關鍵大戰，對雙方嚟講都唔係咁好玩，邊隊失分就可能畀榜首雙雄浦和紅鑽、大阪飛腳放甩，爭入前三亦有一定困難，但係川崎班人又似乎好有信心咁喎，上場0:1輸畀大阪飛腳嗰陣，達成咗日職上陣300場嘅大久保，唔單只平常心對待入球荒，仲重申要踢快樂足球。

事實上，今日去川崎個等等力球場又真係會幾快樂吓，因為佢哋亦都學岡山綠雉咁，準備搞萬聖節派對，球場外推出唔少限定版萬聖節產品，糖自然唔少得，仲有一款改成南瓜味嘅曲奇餅添。不過，早兩日岡山綠雉一搞萬聖節P就撞鬼，輸咗鋪杰撻撻嘅，唔信邪嘅川崎會唔會衰埋一份呢？

由兩隊近況去講又未必喎，川崎嘅主勝率同鳥棲嘅客勝率，雖然都係得50個巴仙，正式勢均力敵，但係check番雙方過去13次喺等等力球場交手，主場嘅川崎贏10輸3，優勢非常明顯，主勝開出機率好高，之不過大家要注意一樣嘢，就係呢兩隊對碰開大比率仲高，13戰開咗12場大，川崎仲開過3次「主其他」添，又從未試過和波，咁好路做乜唔博入球大呢？