遠征希臘例腳軟！祖記讓平半撐唔過

猪拉多纳

今屆歐聯A組實力平均，4支球隊同樣錄得1勝1負，所得3分全靠主場搶番嚟，證明佢哋一旦離開自己地頭搶分難度倍增。祖雲達斯今晚作客奧林比亞高斯，睇番佢哋遠征希臘戰績麻麻，唔似讓得起對手平半，撐2.08倍下盤。

（有線63周四凌晨2:45直播）
主力守將未好番

祖雲達斯雖然係歐洲名牌勁旅之一，但近年實力逐漸被其他球隊拉近，上屆仲喺分組賽提早畢業添。翻查佢哋過去作客希臘紀錄未見突出，合共取得4勝3和3負，就算今晚有中場維達爾復出，射手泰維斯狀態弗，亦難穩勝。更大鑊係班波後防表現滑落，計埋上場作客打和弱旅薩斯索羅1:1已經連續3場失守，偏偏守將巴沙利、馬田卡沙利斯又未好番，未必咁易零封對手喎。

另邊廂奧林比亞高斯主場威力超勁，上屆砌低過曼聯同賓菲加，今屆亦搞掂咗馬體會。為咗今晚成功搶分，奧軍喺上輪聯賽仲收起中場阿費利、守將艾比度等人。後者歐戰經驗豐富唔使多講，前者喺巴塞撈唔掂但現已成為奧軍核心，亦喺歐聯貢獻入球、助攻各一，今次抖足迎戰「斑馬軍團」，至少可以幫主隊執番分走囉。